तेह्रथुम । नेपाल कम्युनिष्ट पार्टी (एमाले) तेह्रथुमले वडाकेन्द्रित ‘जरा अभियान’ को तयारी शुरु गरेको छ । आगामी निर्वाचनमा एक्लै बहुमत ल्याउने लक्ष्य राखेर चलिरहेको ‘मिसन–८४’ अभियान सँगै वडाकेन्द्रित अभियानमा जुटेको नेकपा एमाले जिल्ला कमिटिका पुृर्व पार्टी अध्यक्ष तथा कोशी प्रदेश प्रचार विभाग प्रमुख लक्ष्मण तिवारीले जानकारी दिनुभयो ।
केन्द्रिय कमिटिको निर्णय अनुसार नेकपा एमाले तेह्रथुमले संगठनका कमजोरी, जनताको चासो र गुनासो संकलन गरी सम्बोधनको प्रयास गर्ने उद्देश्य सहित अभियान सुरु गर्न तयारी थालेको हो ।
‘जरा अभियान वडा केन्द्रीत कार्यक्रम हो । जनता सम्म पुग्ने, भेटघाट गर्ने, समस्या के हो ? आवश्यकता के के छन् ? संकलन गर्ने र कार्यान्वयनमा पहल हुनेछ,’ प्रचार विभाग प्रमुख तिवारीले भन्नुभयो ‘एमालेले गरेका विकास निर्माणका कामहरुको प्रचार गर्दै एमाले माथी हाल भैरहेको साइबर आक्रमणलाई साइबर प्रणाली बाटै प्रतिकार गर्न पनि अभियानले सहयोग पुर्याउने छ।’
एमालेको नेतृत्वमा भएका राम्रा कामहरू जनता सम्म पुर्याउने र जनताको सुझाव संकलन गरेर समृद्धिको कार्यक्रम तयार गर्न यो अभियान संचालन गरिएको प्रचार विभाग प्रमुख तिवारीको भनाई छ । तिवारीका अनुसार वडा केन्द्रित अभियान अन्तर्गत जिल्लामा संचालन हुने जरा अभियानमा स्थानीय स्तरका नेता तथा कार्यकर्ताहरु प्रत्यक्ष रुपमा खटिनेछन् । संगठनका कमजोरी, जनताको चासो र गुनासो के छ ? भन्ने कुरा त्यो अभियानको क्रममा संकलन गरिने र सम्बोधनको प्रयास हुने तिवारीले वताउनु भयो ।
‘जनसंगठन मार्फत विभिन्न पेसा र व्यवसायमा रहेका गैरएमाले पंक्तिलाई एमालेको नजिक ल्याउने काम यो अभियानमा हुनेछ’ जिल्ला कमिटि तेह्रथुमका अध्यक्ष शिव ढुंगानाले भन्नुभयो ‘जरा अभियानमा एमालेले नेतृत्व गरिरहेका र यसअघि नेतृत्वमा हुँदा गरेका विकास निर्माण लगायतका कामहरूको प्रचार पनि गरिनेछ।’
स्थानीय तह तथा वडा कमिटी अधिवेशन सम्पन्न गर्ने, आगामी चैतभित्र संगठित सदस्य नवीकरण सम्पन्न गर्ने, जनसंगठन कमिटी गठन, सरकारको समृद्धिको अभियानलाई सफल बनाउने ‘एजेन्डा’ अघि राखेर सम्बन्धित निकायमा दबाब दिने लगायत कार्यक्रम गरिने तेह्रथुम बाट कोशी प्रदेशसभामामा प्रतिनिधित्व गर्ने प्रदेशसभा सदस्य कमला दर्नालले वताउनु भयो ।
तीन वटै तहमा रहेर जनताको हितमा एमालेले काम गरिरहेकाले त्यसको प्रचारमा पनि पार्टीपंक्ति परिचालन गरिने तिवारीको भनाई छ । अभियानका क्रममा हुने महत्वपूर्ण काम भनेको जनतासँग एमालेलाई अझ कसिलो गरी जोड्नु हो । यो अभियानमा एमालेले जनताबाट सिक्ने र जनतालाई सिकाउने नीति कार्यान्वयन गर्ने प्रचार विभाग प्रमुख तिवारीले वताउनु भयो ।
अभियानका क्रममा प्रधानमन्त्री केपी ओली नेतृत्वको सरकारले गरेका सुशासन, विकास निर्माणका बारेमा जनतालाई जानकारी गराईने एमाले तेह्रथुमले जनाएको छ ।
अभियानमा मुख्य यि काम हुनेछन् :
१. पार्टी सदस्यता सम्बन्धि काम सुव्यबस्थित गर्ने (नवीकरण, बिस्तार, अनलाइन अभिलेखिकरण, प्रशिक्षण र परिचालन)
२. कम्तिमा वडा तहसम्म कमिटीका अधिवेशनहरु सम्पन्न गरिसक्ने । सबै टोलमा पार्टी कमिटीहरु बनाउने र सुचारु गर्ने ।
३. संगठनात्मक अराजकता र अवसरवादलाई पराजितगर्न कमिटी जीवनमा व्यापक शुद्धीकरण गर्ने ।
४ .प्रायोजित मिथ्या प्रचार (साइवर हमला) को प्रतिवादगर्ने । भ्रमपार्नै नदिनेगरी टोल तहसम्म प्रशिक्षण चलाउने ।
५. कार्यकर्तामा आत्मविश्वास जगाएर पार्टीलाई घर–घर पुर्याउने र जनतामा आशा जगाउने ।
६. जनताका माग मुद्दा तथा समस्यामा अग्रसरता लिने र आर्थिक सामाजिक तथा सांस्कृतिक रुपान्तरणलाई तिब्रता दिने ।
७. युवामा पहुंच बढाउन, युवा नेतृत्व बिकासको योजनाबद्ध थालनी गर्ने
८. अबको पार्टी काममा डिजिटल माध्यम अपनाउन वडा तहसम्मका पार्टी कमिटीलाई सचेत पार्ने ।
९. जनतासंग जनसंगठन अभियान चलाउने (वडासम्म जनसंगठनका कमिटी निर्माण, सद्स्यता बिस्तार, प्रशिक्षण, सम्बन्धित समुदायका समस्या समाधानमा अग्रसरता)
१०. वडा तहसम्म पार्टी कार्यालयहरु सुव्यबस्थित गर्ने ।
